Eidg. Hornusserfest - A-Mannschaft
Nachder misslungene Meisterschaft het d' A-Mannschaft am Eidgenössische Hornusserfest wöuue zeige, was mir eigentlech chöi. Anhornusse isch am Samstig am 14:10 bi rund 30 Grad gäge Oberdiessbach A gsi - ä bekannte Gägner usder Meisterschaft. Z' Spiu isch düre Wütrich Yännu eröffnet worde u am Bock heimer grundsätzlech eh solidi aber nid überragendi Leischtig zeigt. Umso besser isches üs im Ries glüffe; dank einiger Schleierwulke si die meiste Nousse früeh gsichtet worde u jede Nouss het chönne erfolgrich abgwert wärde. Da sich bi üsem Gägner sehr viu Fäuhstreiche ihgschliche hei, heimer das Spiu de mit knappe 8 Punkt Vorsprung für üs chönne entscheide.
Am zwöite Tag het d' Uslosig äbefaus ä bekannte Gägner usder Meisterschaft ergä: Ufem 22. Rang heimer dr' Ausstich gäge Epsach A gspiut. Dasmau heimer z' Spiu im Ries ahgfange. Bi blauer Sicht u erneut Temperature nach ade 30 Grad heimer erneut ä solidi Riesleischtig zeigt u das 40. Eidgenössiche Hornusserfest mit 0 Nummero chönne beände! Am Bock heimer leider ou hüt zahlrichi Fäuhstreiche müesse la schribe; am Ändi vom Tag si de nomau 895 Punkt uf üses Konto derzue cho was es Total vo 1'822 Punkt bedütet het. Da üse Gägner hüt 1 Streich het müesse la ungerstriche, heimer ou zü hüttige Spiu chönne für üs entscheide! Bravo Manne. Dank dere starche Riesleischtig vom ganze Team heimernis de schliesslech vom 22. Rang no bis ufe 15. Schlussrang chönne fürekämpfe.
Bide Einzuschleger loufts über z' ganze Wucheend am Ädu Leuenberger (143 Punkt, 65. Schlussrang) u am Märcu Muralt (140 Punkt, 86. Schlussrang) am Beste. Beid chöi ihre 1. Eidgenössisch Chranz entgägenä, härzlechli Gratulation!
Zwöituszeichnige chöi dr' Märcu Steck, Luca Fankhauser, Töbu Hertig, Michu Rohr, Päscu Schwarz, Yännu Gurtner u Märu Hofer entgägenä. Ä bsungregi Ehr chunt am Hans Leuenberger zu teil: Är wird miter Veteranenuszeichnig geehrt!
Für d' A-Mannschaft geit ä intensivi Zyt ir Nationalliga B u am Eidg. Hornusserfest ir 2. Stärkeklass z' Änd. Mit üsne Hornmatche u Chliinahläss wärdimer die Saison no gmüetlech usklinge la u fröie üs, am 19. Oktober am Tourismushornussen ader Lenk teilz'nä.