Emment. Hornusserfest Wasen - A

Z' Emmentalische Hornusserfest im Wase ligt dasmau nume grad wenigi Kilometer vo üsem Hornusserplatz dänne, darum heimer hüt ou nid so früeh wie uf Gossau losmüesse. Nütdestotrotz simer glich motiviert ah da Spiiu am Morge häre gange. Und was isch de das fürne Start gsi: Bi konstantem Gägeluft glinge üs mit 260 u 277 zwöi Top-Ries und schiesse üs ufe sehr guet 5. Zwüscherang füre. Mir hei unerwartet es Ziiu vor Ouge: Mindestens 1 Platz müessimer guet mache für eh erneute Horngwinn! Und ou am Namittag glingt üs eh super Schlagleistig am Bock, bi no stercherem Gägeluft schaffemer nomau dütlech über 1'000 Punkt z' schlah - und - schaffes miteme Totau vo 1'547 Punkt sogar no die vor üs platzierti HG Zauggenried-Kernenried z' überschlah! Dank are erneut subere Riesleistig heimer auso ou hüt ufenes Horn chönne hoffe. Und wo de am spetere Namittag würklech klar isch gsi, dasmer mitem 4. Schlussrang tatsächlech es Horn gwinne, isch d' Fröid gränzelos gsi! I somne starche Teilnähmerfäud es Emmentalisches Horn ga gwinne - Geniau!

Ou bide Einzuschleger isches hüt ih Sache Chranz- u Medaillegwinner guet glüffe: Mit Fankhauser Luca (107), Althaus Sven (106), Aeberhard Luca (102), Leuenberger Adrian (99), Leuenberger Stöffu (99) u Langenegger Michael (97) chranzne grad 6! Medaillegwinner si Burkhard Chrigu (92), Steck Marco (91), Wüthrich Yannick (90) u Aeberhard Nando (87).

Für d' A-Mannschaft isches auso ou nachder glungene Meisterschaft meh aus erwartet witergange und es hei grad zwöi Horn chönne gwunne wärde! Iz lige no es paar Hornmatche u Fründschaftsspiiu vor üs bismer de id' Winterpouse gö und nächst Jahr mit nomeh Motivation u Energie id' Saison starte!