MS Bern-Beundenfeld - B

Starchi Gsamtleischtig vor A-Mannschaft längt hüt leider nid zum Siig gägenes überragends Bern-Beundenfeld B!

3. Platz vorder letschte Rundi: d' Usgangslag isch klar gsi für üs im letschte Spiu uswärts gäge Bern-Beundenfeld B. Nämimer 4 Punkt, simer 3. Im schlimschte Fau gheiimer ufe 7. Platz hingere. Schlussändlech isches öbbis zwüschinne worde. Beid Mannschafte chöi hüt bi nid eifache Sichtverhäutnis im Riis überzüge u mache das Spiiu um Platz 3 am Bock us. Und da loufts üs leider im erschte Umgang nid würkli rund; trotz guete Windbedingige längts mit paarne eistellige Streiche no zu 500 Punkt. Bärn widerum nimmtnis de bereits ide erschte beide Riis 56 Punkt ab. Im zwöite Umgang verbesseretsech d' Heimmannschaft nomau u schlaht zwöi 300er Riis. Für üs sicher unerreichbar. Trotzdem heimernis nid lah verunsichere und Heinis ouno chönne steigere, mit 272 u 270 Punkt längt aber ou das niene häre. Da Bowil u Bern beidi 4 Rangpunkt ghout hei simer de schliesslech glich no ufe 5. Schlussrang zruggheit. Wemer luege, wimer das Jahr id' Meisterschaft gstartet si, isches sicher chli eh enttüschig, dasmer nid unger die erschte 3 Mannschafte si cho. Aber z'friede chöimer aui mau si - vorauem heimer öbbis gschafft, womer bishär nonie gschafft hei: Im Meisterschaftsschnitt über 1'000 Punkt pro Spiiu gschlage!

Höchst Einzuschleger isch hüt Yännu Gurtner mit sehr guete 74 Punkt worde!

HG Unterfrittenbach-Emmenmatt A   0 Nr. / 1'048 Punkt