MS Mützlenberg-Nesselgraben - A

Zitterpartie bim erschte Meisterschaftsspiiu gäge d' HG Mützlenberg-Nesselgraben A! 

Z' eigendleche Uswärtsspiiu heimer hüt bi üs im Längenbach düregfüehrt, da wägem Schnee im Nesselgraben hinger nid het chönne ghornusset wärde. Im erschte Umgang het üse Gägner mit 468 Punkt sicher nonid ganz überzügt. Mir hei ounochli verhaute druf reagiert und mit 237 253 Punkt eh chline Vorsprung vo 22 Punkt usegschlage. Im zwöite Umgang hets die erschti Zitterpartie im Riis gä; 4-5 schlächt troffeni Nousse hei vo üs müesse entschärft wärde. Vorauem dr' aueriletscht Striich het äue es paarne weichi Scheiche gmacht - schnäu u mit zauhriche Richtigsänderige ischer bis iz 9ni gfloge, wone de Authus Svenu het chönne abwehre - Svenu hetsech hüt sicher dr' Goldig Heum verdient! Mützlenberg-Nesselgraben het de am Bock no ufdräit u mit 253 u 255 totau 976 Punkt gschlage. Und ou mir hei üs nomau chli chönne steigere, hei im 2. Umgang numeno 2 Punkt uf üse Gägner ihbüesst und mit 996 Punkt eh soligi Leischtig zeigt!

Höchst Einzuschleger vo üs wird hüt erneut Svenu Althaus mit 74 Punkt und houtsech 28 Rangpunkt. Svenu machts üs vor und zeigt i dere Saison bereits eh Topform!

Trotz viune Fäuhstreiche heimer hüt im erschte Meisterschaftsspiiu bereits fasch 1'000 Punkt gschlage, was zeigt, das üsi Mannschaft das Jahr grossi Ambitione nach obe het! Die 1'000-Punkt-Grenze söttimer hür i jedem Spiiu chönne erreiche!